បងស្រីសពស្រី្តស្អាតរុំភួយ ប្រាប់ថា ប្អូនស្រីបាត់ខ្លួន១យប់ជាមួយនឹងម៉ូតូស្គូពីមួយគ្រឿង

រាជធានីភ្នំពេញ ៖ នារីម្នាក់បម្រើការនៅក្លិប៥៥ បានត្រូវឃាតករដែលគេសង្ស័យថា អាចជាមនុស្សស្គាល់គ្នារឹតកសម្លាប់ រួចយកភួយ និងកម្រាលពូករុំសពដឹកយកទៅកប់ចោលនៅក្នុងគំនរសំរាម តាមចិញ្ចើមផ្លូវលេខ១០០៣ ក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ ។

តាមព័ត៌មានពីបងស្រីនារីរងគ្រោះ បានឱ្យដឹងថា ប្អូនស្រីនាងបានបាត់ខ្លួនកាលពីវេលាម៉ោង៦ល្ងាចថ្ងៃទី១៥ ខែវិច្ឆិកា ដោយជិះម៉ូតូស្គូពីមួយគ្រឿង ពណ៌ស ពាក់ផ្លាកលេខ ភ្នំពេញ១SC ៣៨៩១ មិនដឹងថា ទៅណា ។ លុះនៅព្រឹកឡើងថ្ងៃទី១៦ ខែវិច្ឆិកា ទទួលដំណឹងតាមប្រព័ន្ធផ្សព្វផ្សាយក៏ធ្វើដំណើរមកឈាបនដ្ឋានវត្តក្រាំងធ្នង់ ទើបដឹងថាជាប្អូនស្រីរបស់នាងត្រូវបានគេសម្លាប់ ។ សពត្រួវបានក្រុមគ្រួសារនាំយកទៅតម្កល់នៅឈាបនដ្ឋានវត្ដចាក់អង្រែក្រោម ដើម្បីធ្វើបុណ្យតាមប្រពៃណី ។

នេះជាការសម្លាប់ដ៏ព្រៃផ្សៃមួយទៀត ទៅលើស្ដ្រីភេទចេញពីកន្លែងកម្សាន្ដ ។ គេនៅចាំបានថា កាលពីជាង១ខែមុន ស្ដ្រីខារ៉ាអូខេម្នាក់ត្រូវបានសង្សារសម្លាប់នៅក្នុងផ្ទះសំណាក់អូយេស តែបន្ទាប់ពីបានស្គាល់អត្ដសញាណនារីរងគ្រោះមក ទីបំផុតឃាតករដៃដល់ក៏ត្រូវចាប់ខ្លួន ប្រឈមនឹងការជាប់ពន្ធនាគារដោយគ្មានថ្ងៃចេញឡើយ ។

ចំណែកឃាតកម្មយ៉ាងសាហាវព្រៃផ្សៃមួយទៀតនេះ បានបង្កឱ្យមានការភ្ញាក់ផ្អើលឡើងកាលពីវេលាម៉ោង១០និង២០នាទីព្រឹកថ្ងៃទី១៦ ខែវិច្ឆិកា ខណៈអ្នករើសអេតចាយម្នាក់បានទៅកកាយរើសយករបស់របរអេតចាយនៅគំនរសំរាមនោះ ហើយក៏ប្រទះឃើញសព ។

សពនារីរងគ្រោះត្រូវបានសមត្ថកិច្ចឱ្យដឹងថា ឈ្មោះ កែវ កញ្ញា អាយុ១៩ឆ្នាំ ជាស្ដ្រីបម្រើការនៅក្លិបកម្សាន្ដ៥៥ ស្ថិតនៅក្នុងសង្កាត់ចតុមុខ ខណ្ឌដូនពេញ ស្នាក់នៅផ្ទះលេខ១១៤៧ ផ្លូវជាតិលេខ២ ក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។

មន្ដ្រីនគរបាលប៉ុស្តិ៍ភ្នំពេញថ្មី បានឱ្យដឹងថា នៅព្រឹកថ្ងៃកើតហេតុ មានបុរសម្នាក់ឈ្មោះ ខេង គួក ហៅជ្រូក អាយុ៤២ឆ្នាំ ជាអ្នកដើររើសអេតចាយ បានទៅរើសអេតចាយនៅគំនរសំរាមនោះក៏ប្រទះឃើញភួយដែលបានរុំសព លុះកាយទាញមើលស្រាប់តែឃើញជើងមនុស្សក៏មានការភ្ញាក់ផ្អើលតែម្តង ។ ភ្លាមៗ សមត្ថកិច្ចមូលដ្ឋានបានចុះទៅកន្លែងកើតហេតុ ហើយចងខ្សែឡោមព័ទ្ធ ដើម្បីរង់ចាំនគរបាលជំនាញចុះទៅត្រួតពិនិត្យ ។

សពត្រូវបាននគរបាលដឹកបញ្ជូនទៅកាន់ឈាបនដ្ឋានវត្តក្រាំងធ្នង់ នៅវេលាម៉ោងប្រមាណ១១និង៥០នាទីថ្ងៃត្រង់ថ្ងៃដដែលដើម្បីត្រួតពិនិត្យ ។ ទន្ទឹមពេលដែលសមត្ថកិច្ចកំពុងធ្វើការត្រួតពិនិត្យ បងស្រីរួមទាំងមិត្តភក្តិរបស់នារីរងគ្រោះ ក៏បានទៅដល់ទើបស្គាល់អត្តសញ្ញាណសព ។

តាមការត្រួតពិនិត្យ នារីរងគ្រោះត្រូវឃាតកររឹតកនឹងខ្សែភ្លើងឆ្នាំងដាំបាយអគ្គិសនី ហើយយកកន្សែងពណ៌ស្វាយគ្របមុខ រួចរុំភួយពណ៌ផ្កាឈូកលាយស និងយកខ្សែនីឡុងចំណងគោចងត្រង់ក ចង្កេះ និងចងរុំជើង ព្រមទាំងយកកម្រាលពូករុំផ្នែកខាងចុងជើង ។

តាមមន្ត្រីនគរបាលជំនាញបានឱ្យដឹងថា នារីរងគ្រោះត្រូវឃាតកររឹតកសម្លាប់នៅកន្លែងណាមួយ រួចហើយដឹកសពតាមរថយន្តយកទៅទម្លាក់ចោលនៅគំនរសំរាមក្បែរចិញ្ចើមផ្លូវចំណុចខាងលើ ។

លោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ ដែលចុះទៅផ្ទាល់ដល់កន្លែងកើតហេតុ ថ្លែងថា ឃាតករអាចជាមនុស្សស្គាល់គ្នាជាមួយនារីរងគ្រោះ ហើយរឹតកសម្លាប់នៅកន្លែងណាមួយ មិនមែននៅក្នុងមូលដ្ឋានខណ្ឌសែនសុខទេ រួចទើបដឹកសពយកមកទម្លាក់ចោលនៅទីនេះ ។ លោកអធិការថ្លែងទៀតថា លោកកំពុងសហការជាមួយក្រុមគ្រួសារជនរងគ្រោះ ដើម្បីស្រាវជ្រាវជុំវិញករណីឃាតកម្មនេះ ។

តាមប្រភពព័ត៌មានបានឱ្យដឹងថា ក្លិប៥៥នោះទើបតែបើកថ្មី ហើយពេលនេះសមត្ថកិច្ចមិនទាន់មានការសន្និដ្ឋានបែបណានៅឡើយទេ តែករណីនេះពិតណាស់ថា ក្រុមឃាតករដៃដល់ប្រហែលមិនរួចខ្លួន ៕