មុខរបរចម្លែកៗទាំង14 នៅជុំវិញពិភពលោក ដែលអ្នកអាចនឹងមិនធ្លាប់ បានដឹងពីមុនមក! មោះមើលទាំងអស់គ្នា

តើអ្នកដឹងទេថា អ្នកធ្វើការងារ ដើម្បីអ្វី? អ្នកខ្លះធ្វើការងារ ដោយសារតម្រូវការ អ្នកខ្លះ ធ្វើសម្រាប់កំសាន្តសប្បាយ អ្នកខ្លះទៀត ធ្វើសម្រាប់បំពេញនូវកខ្វះខាតផ្សេងៗ។ ពិភពលោកមួយនេះ មានរឿងជាច្រើន ដែលត្រូវរុករក និងមានរឿងជាច្រើន ដែលអ្នកមិនធ្លាប់បានដឹង សូម្បីតែការងារខ្លះ ក៏អ្នកសឹងតែមិនជឿថា មានពិតលើលោកនេះផង!

ឥលូវនេះមកតាមដាន បណ្តាការងារខាងក្រោមនេះ ដែលត្រូវបានគេចាត់ទុកថា ជាការងារដែលចម្លែកៗបំផុត នៅលើពិភពលោក ៖ 

១. អ្នកត្រួតពិនិត្យគុណភាពគ្រាប់ឡុកឡាក់

គ្រាប់ឡុកឡាក់ ដែលមានជ្រុងណាមួយ មិនស្មើតែបន្តិចនោះ អាចមានបញ្ហាដល់លទ្ធផល នៃការលេងល្បែងដែលពាក់ព័ន្ធនឹងវា។ ហេតុនេះ គ្រាប់ឡុកឡាក់មួយគ្រាប់ៗ ត្រូវធ្វើតេស្តត្រួតពិនិត្យគុណភាពដោយ អ្នកជំនាញ។ កុំមើលស្រាល ការងារនេះឲ្យសោះ! 

២. អ្នកប្រមាញ់ពិសពស់

អ្នកប្រមាញ់យកពិសពស់ ជាការងារដែលត្រូវស្វែងរកពស់កាចសាហាវបំផុត របស់ពិភពលោក រួមមានពស់កន្ទុយកន្តឹង និងពស់វែកធំៗជាដើម។ ពិសពស់ ដែលយកចេញពីសត្វពស់ ត្រូវបានយកទៅបង្កើតជា វ៉ាកសាំង ក្នុងមន្ទីរពេទ្យ ឬយកទៅប្រើក្នុងមន្ទីរពិសោធន៍។ ពិសពស់ ១០០ ក្រាម អាចលក់បានដល់ទៅ ១,០០០ ដុល្លារអាមេរិក។ 

៣. អ្នករុញអ្នកដំណើរជិះរថភ្លើង

រដ្ឋាភិបាល របស់ប្រទេសជប៉ុន បានផ្តល់ជាការងារមួយ ដែលតម្រូវឲ្យបុគ្គលិកត្រូវរុញ និងប្រជ្រៀត អ្នកដំណើរជិះរថភ្លើងផ្លូវក្រោមដី ចូលក្នុងទូរថភ្លើង ដើម្បីប្រាកដថា មានមនុស្សនៅខាងក្នុងពេញ និងមិនឲ្យមានកន្លែងសេសសល់ទំនេរ ក្នុងរថភ្លើងឡើយ។ 

៤. អ្នកកំណត់ភេទសត្វមាន់

បុគ្គលិកការងារនេះ តម្រូវឲ្យពួកគេកំណត់ភេទសត្វមាន់ និងសត្វភ្ញាស់ពងផ្សេងទៀត ដោយពឹងផ្អែកលើវិចារណញាណ។ ការធ្វើបែបនេះគឺ ដើម្បីងាយស្រួល ក្នុងការផលិតសាច់ និងស៊ុតមាន់ របស់ក្រុមហ៊ុនធំៗ។ នៅប្រទេសអង់គ្លេស និងប្រទេសជប៉ុន អ្នកជំនាញខាងការងារនេះ អាចរកបានម្រមាណ ៦០,០០០ ដុល្លារអាមេរិក ក្នុងមួយឆ្នាំ។ 

៥. អ្នកជីកជន្លេន

តើអ្នកធ្លាប់ដឹងថា ដង្កូវ ឬជន្លេនរបស់អ្នកស្ទូចត្រីបានមកពីណាដែរទេ? បណ្តាអ្នកជីកជន្លេនទាំងអស់ អាចជីកជន្លេនបានតែនៅពេលយប់ ក្នុងពេលមានភ្លៀងធ្លាក់ រួចទើបលក់ទៅអ្នកស្ទូចត្រី ក្នុងទីផ្សារជុំវិញពិភពលោក។ 

៦. អ្នកភ្លក់អាហារសត្វចិញ្ចឹម

អ្នកភ្លក់អាហារសត្វ ត្រូវបានក្រុមហ៊ុនលក់ផលិតផលអាហារសត្វ ជួលមកហិតក្លិន និងភ្លក់អាហារទាំងនោះ មុននឹងដាក់លក់។ ជាពិសេស ពួកគេអាចវាយតម្លៃអាហាររូបត្ថម្ភ តាមរយៈការភ្លក់បានទៀតផង។

៧. សង្សារក្លែងក្លាយ

អ្នកជំនាញខាងផ្នែកនេះ គិតថ្លៃ ៨០ ដុល្លារអាមេរិក ក្នុងមួយម៉ោង ក្នុងការទៅធ្វើជាសង្សារ ឱប ឬប្រឡែងលេង ជាមួយមនុស្សមិនដែលស្គាល់ជាច្រើននាក់។ ការងារនេះ ជួនកាលអាចធ្វើឲ្យប៉ះពាល់ ដល់អារម្មណ៍ផ្ទាល់ខ្លួនផងដែរ។ 

៨. អ្នករង់ចាំក្នុងជួរ

ការងាររបស់ពួកគេគឺ ជំនាញខាងឈរចាំតម្រង់ជួរ។ អ្នកជំនាញខាងឈរ ដូចជាពួកគេ មានភាពមមាញឹកណាស់ នៅពេលមានកម្មវិធីលក់បញ្ចុះតម្លៃធំៗ ឬពេលមានផលិតផលចេញលក់ថ្មីៗ (ឧទាហរណ៍ នៅពេលចេញលក់ iPhone)។ បុរសម្នាក់បាននិយាយថា លោកអាចរកបានរហូតដល់ទៅ ១,០០០ ដុល្លារ ក្នុងមួយអាទិត្យ។ 

៩. អ្នកវិភាគសាច់ផ្ទៃមុខ

អ្នកជំនាញខាងវិភាគសាច់មុខ ឬត្រូវគេស្គាល់ថាជា “អ្នកវិទ្យាសាស្រ្ត ដែលប្រើញាណ”។ ពួកគេ ប្រើដៃមកវិភាគ ថាតើឡេលាបស្បែក ឬហ្វូមលាងសម្អាតមុខ របស់ក្រុមហ៊ុនលក់ផលិតផលទាំងនោះ មានប្រសិទ្ធភាពដល់កម្រិតណា។ ពួកគេអាចរកចំណូលបាន ដល់ទៅ ២៥ ដុល្លារក្នុងមួយម៉ោង។ 

១០. អ្នករំកិលផ្ទាំងទឹកកក

The International Ice Patrol (IIP) ដែលជាក្រុមហ៊ុនរំកិលផ្ទាំងទឹកកក ត្រូវបានបង្កើតឡើងក្រោយមួយឆ្នាំ បន្ទាប់ពី កប៉ាល់ Titanic បានលិចបាត់ ក្នុងឆ្នាំ ១៩១២ ដែលដំណើរការដោយ ឆ្មាំសមុទ្រអាមេរិក។ ពួកគេតាមដានទីតាំងរបស់ផ្ទាំងទឹកកក និងផ្តល់ជាផ្លូវសុវត្ថិភាពដល់អ្នកធ្វើដំណើរ។ ក្នុងករណីចាំបាច់ ពួកគេត្រូវអូសផ្ទាំងទឹកកកចេញពីតំបន់នោះទៀតផង។ 

១១. អ្នកជំនាញកាន់ទុក្ខ

អ្នកជំនាញទាំងនេះ ត្រូវបានជួលមកយំសោក កើតទុក្ខ ក្នុងពិធីបុណ្យសព។ ក្រុមហ៊ុនមួយ នៅក្នុងប្រទេសអង់គ្លេសមួយ មានឈ្មោះថា “Rent A Mourner” គឺជាក្រុមហ៊ុនដែលឈានមុខគេ ក្នុងវិស័យនេះ។ ក្នុងរយៈពេល ២ ម៉ោង អាចរកបានប្រហែល ៧០ ដុល្លាអាមេរិក។ 

១២. អ្នកសាកល្បងគ្រោះថ្នាក់របស់កម្មវិធីទូរទស្សន៍

អ្នកសាកល្បងគ្រោះថ្នាក់ ទាំងឡាយត្រូវប្រាកដថា កម្មវិធីគ្រោះថ្នាក់របស់ទូរទស្សន៍ រួមមានដូចជា ហែលទឹកជាមួយពស់ ឬញ៉ាំសត្វកន្លាត ត្រូវមានសុវត្ថិភាព មុនពេលដែលភ្ញៀវកិត្តិយស និងតារាល្បីណាមួយចូលទៅលេងកម្មវិធីនោះ។ 

១៣. អ្នកហិតផោមសត្វគោ

អ្នកប្រាកដជាចង់ដឹងថា ហេតុអ្វីបានជាគេ ត្រូវការអ្នកហិតផោមគោ យ៉ាងដូច្នេះ? ហេតុផល ជាក់ស្តែង ដែលគេត្រូវតែហិតផោមគោ នោះគឺដើម្បីចង់ដឹងថាតើ សត្វគោនោះស៊ីចំណីបានត្រឹមត្រូវ និងមានសុខភាពល្អដែរឬក៏អត់។ 

១៤. អ្នកវិភាគក្លិន

ការងារនេះ តម្រូវឲ្យបុគ្គលិក ធ្វើការហិតក្លៀក របស់មនុស្ស។ ជាការពិតណាស់ ពួកគេធ្វើបែបនេះ ដើម្បីប្រាកដថា ផលិតផលបំបាត់ក្លិនក្លៀក របស់ក្រុមហ៊ុនពួកគេ មានប្រសិទ្ធភាពពិតប្រាកដមែន មុននឹងធ្វើការដាក់លក់នៅលើទីផ្សារ៕