តារា​ហូលីវូដ​​ ៦រូប ដែល​មាន​តម្លៃ​ខ្លួន​​រាប់​លាន​ដុល្លារ​តាំង​ពី​ក្មេង

Daniel Radcliffe, Macaulay Caulkin, Emma Watson... ទទួល​បាន​តម្លៃ​ខ្លួន​រាប់​​លាន​ដុល្លារ​នៅ​ពេល​​ដែល​អាយុ​មិន​ទាន់​ដល់​២០ ឆ្នាំ​ផង។ បើ​ទោះ​បី​ជា​មាន​វ័យ​ក្មេង​ខ្ចី​ តែ​វា​មិន​បាន​​ធ្វើ​ឲ្យ​តារា​សម្ដែង​ទាំង​នេះ​​​រក​ប្រាក់​ចំណូល​បាន​តិច​ នោះ​ទេ។ ផ្ទុយ​មក​វិញ​​ដោយ​សារ​តែ​​ទេពកោសល្យ​ក៏​ដូចជា​​ភាព​ប៉ិនប្រសប់​របស់​ខ្លួន បាន​ជំរុញ​ឲ្យ​តារា​ទាំង​នេះ​មាន​ឈ្មោះ​ល្បី​និង​ទ្រព្យ​សម្បត្តិ​ ស្ដុកស្ដម្ភ។

១. Daniel Radcliff

  តារា​សម្ដែង​មក​ពី​ប្រទេស​អង់គ្លេស​​​ទទួល​បាន​​តម្លៃ​ខ្លួន​ ១៤លាន​ដុល្លារ​សម្រាប់​ការ​ថត​រឿង "Harry Potter and the Oder of the Phoenix” ក្នុង​ឆ្នាំ ២០០៧ នៅ​ពេល​ដែល​មាន​អាយុ ១៨​ឆ្នាំ។ ឆ្នាំ​នេះ​ Daniel មាន​អាយុ​ ២៦ ឆ្នាំ។ បច្ចុប្បន្ន​ទ្រព្យ​សម្បត្តិ​របស់​តារា​មួយ​នេះ​បាន​ឡើង​ដល់ ១១០ លាន​ដុល្លារ។

២. Taylor Lautner

  ដោយ​ចូល​រួម​សម្ដែង​ក្នុង​រឿង "Twilight” វគ្គ ១ ឆ្នាំ ២០១១ នៅ​ពេល​ដែល​មាន​អាយុ​ទើប​តែ ១៩​ឆ្នាំ Taylor ទទួល​បាន​តម្លៃ​ខ្លួន ១២.៥ លាន​ដុល្លារ។ ក្រៅ​ពី​នោះ Taylor ក៏​ទទួល​បាន​បន្ថែម ៣% ពី​​ចំណូល​សរុប​របស់​ភាពយន្ត​នេះ​ផង​ដែរ។ តារា​ដែល​បាន​ចូល​រួម​សម្ដែង​ក្នុង​រឿង​នេះ​ដូច​ជា Kristen Steward និង Robert Pattinson ក៏​ទទួល​បាន​ប្រាក់​ចំណូល​ប្រហាក់ប្រហែល​នេះ​ដែរ​តែ​​ពួក​គេ​សុទ្ធ​​តែ​មាន​ អាយុ​លើស​ពី ២០ ឆ្នាំ អស់​ហើយ​នៅ​ពេល​នោះ​។ ទ្រព្យ​សម្បត្តិ​សរុប​របស់ Taylor ប្រមាណ ៤០លាន​ដុល្លារ។

៣. Macaulay Caulkin

  តារា​ដែល​មាន​ប្រជាប្រិយភាព​យ៉ាង​ខ្លាំង​កាល​ពី​ទសវត្ស​ឆ្នាំ ១៩៩០ ទទួល​បាន​ថវិកា ៨លាន​ដុល្លារ​សម្រាប់​រឿង "Both Getting Even With Dad” ក្នុង​ឆ្នាំ ១៩៩៣ និង​ទទួល​បាន​ប្រហាក់​ប្រហែល​នឹង​ដែរ​សម្រាប់​រឿង "Richie Rich” ក្នុង​ឆ្នាំ ១៩៩៤។ នៅ​ពេល​នោះ Macauly ទើប​តែ​មាន​អាយុ​តែ ១៣ ឆ្នាំ​តែ​ប៉ុណ្ណោះ។ មុន​នោះ​តារា​កើត​ឆ្នាំ ១៩៨០ រូប​នេះ​បាន​មាន​ឈ្មោះ​ល្បី​ខ្លាំង​ក្នុង​រឿង "Home Alone” ក្នុង​ឆ្នាំ ១៩៩០ ពេល​មាន​អាយុ ១០ ឆ្នាំ។

៤. Emma Watson

  នៅ​ពេល​សម្ដែង​រឿង "Harry Potter and the Order of the Phoenix” Emma ទទួល​បាន​ប្រាក់​ចំនួន ៤លាន​ដុល្លារ​ក្នុង​អាយុ ១៧​ឆ្នាំ។ សព្វថ្ងៃ​តារា​ដែល​មក​ពី​ប្រទេស​អង់គ្លេស​រូប​នេះ​បាន​ក្លាយ​ជា​តារា​ដែល​ មាន​ឈ្មោះ​ល្បី​នៅ​ហូលីវូដ​ដែល​​បាន​ចូល​រួម​សម្ដែង​ក្នុង​ភាពយន្ត​ជា​ច្រើន ​ដូច​ជា "The Perks of Being A Wallflower” និង "Noah” ជា​ដើម។ ទ្រព្យ​សម្បត្តិ​សរុប​របស់​ Emma គឺ​ប្រមាណ​ ៦០ លាន​ដុល្លារ។

៥. Rupert Grint

  ដូចគ្នា​នឹង Emma Watson ដែរ Rupert ទទួល​បាន ៤លាន​ដុល្លារ​នៅ​ពេល​សម្ដែង​រឿង "Harry Potter and the Order of the Phoenix" ក្នុង​ឆ្នាំ ២០០៧ នៅ​ពេល​ខ្លួន​មាន​អាយុ ១៩​ឆ្នាំ ។ Rupert និង Emma គឺ​ជា​តួ​អង្គ​រង​សំខាន់​ទាំង​ពីរ​ក្នុង​រឿង "Harry Potter”។ Rupert ប្រឡូក​សិល្បៈ​ដំបូង​ក្នុង​ឆ្នាំ ២០០១ នៅ​ពេល​ដែល​ខ្លួន​ទើប​តែ​មាន​អាយុ ១៣ ឆ្នាំ​នៅ​ក្នុង​រឿង "Harry Potter” វគ្គ ១ ។

៦. Jaden Smith

  នៅ​ពេល​ដែល​មាន​អាយុ​ទើប​តែ ១២ ឆ្នាំ Jaden ទទួល​បាន​ប្រាក់​ចំណូល ៣ លាន​ដុល្លារ​ពេល​សម្ដែង​រឿង "Karate Kid” ក្នុង​ឆ្នាំ ២០១០។ កូន​ប្រុស​របស់​តារា​សម្ដែង Will Smith ចាប់​ផ្ដើម​សម្ដែង​​ដំបូង​ក្នុង​រឿង "The Pursuit of Happiness” ជា​មួយ​ឪពុក​របស់​​ខ្លួន។ ឪពុក​កូន​នេះ​បាន​ជួប​គ្នា​​ម្ដង​ទៀត​ក្នុង​រឿង "After Earth” នៅ​​ឆ្នាំ ២០១៣។ តារា​សម្ដែង​​វ័យ​១៧ ឆ្នាំ​រូប​នេះ​កំពុង​មាន​ទំនាក់​ទំនង​ស្នេហា​ជាមួយ​មិត្ត​ស្រី​អាយុ ២១ ឆ្នាំ Sarah Snyder ៕