ប្រវត្តិជីវិតពិតអតីតប្រធានាធិបតីតោកយ៉ាកបំផុតលើលោក

អ្នកដឹកនាំប្រទេសមួយប្រាកដជាមនុស្សអស្ចារ្យ មានទ្រព្យសម្បត្តិច្រើន ប្រាក់ខែចាយមិនអស់ ប៉ុន្តែអតីតមេដឹកនាំមួយរូបរបស់ប្រទេសអ៊ុយរុយហ្គាយ បែរជាប់ឈ្មោះជាប្រធានាធិបតីតោកយ៉ាកបំផុតក្នុងពេលកំពុងកាន់តំណែង។ ហេតុអ្វីបានជាប្រធានាធិបតីរូបនេះ មានសភាពខុសពីមេដឹកនាំប្រទេសដទៃ?
លោក José Mujica កើតនៅថ្ងៃទី២០ ខែឧសភា ឆ្នាំ១៩៣៥ ដែលបច្ចុប្បន្នឈានចូលវ័យ ៨០ឆ្នាំហើយ។ បុរសដែលមានរហ័សនាមថា “ប្រធានាធិបតីក្រជាងគេលើលោក” បានកាន់តំណែងជាមេដឹកនាំប្រទេសអ៊ុយរុយហ្គាយចាប់ពីថ្ងៃទី០១ ខែមិនា ឆ្នាំ២០១០ រហូតដល់ថ្ងៃទី០១ ខែមិនា ឆ្នាំ២០១៥ ដោយបន្សល់ទុកសមិទ្ធផលជាច្រើនរាប់មិនអស់ ព្រមទាំងការគោរពស្រលាញ់ពីប្រជាជនគ្រប់ស្រទាប់វណ្ណៈ។

ជីវិតឯកជន

នៅក្នុងឆ្នាំ២០០៥ លោក Mujica បានរៀបការជាមួយអ្នកស្រី Lucía Topolansky ជាសមាជិករួមក្រុមចលនាសេរីភាពជាតិ Tupamaros ហើយបច្ចុប្បន្នជាសមាជិកព្រឹទ្ធសភា។ បើទោះបីសាងស្នេហ៍ជាង ១០ឆ្នាំ អ្នកតស៊ូទាំងពីរនាក់នេះហួសពេលនឹងទទួលកូនជាចំណងដៃ ព្រោះចាស់ៗរៀងខ្លួនអស់ទៅហើយ។ ពួកគេទាំងពីរនាក់ រស់ក្នុងកសិដ្ឋានតូចមួយនៅជាយក្រុង Montevideo ដោយគ្មានទ្រព្យសម្បត្តិអ្វីជាដុំកំភួនឡើយ មានត្រឹមឡានកញ្ចាស់មួយម៉ាក Volkswagen Beetle ផលិតឆ្នាំ១៩៨៧។

តស៊ូប្រឆាំងរដ្ឋាភិបាលរហូតជាប់ពន្ធនាគារ ១៤ឆ្នាំ

ដោយសារអតីតប្រធានាធិបតីរូបនេះ មានប្រវត្តិជាអ្នកតស៊ូនយោបាយប្រឆាំងរដ្ឋាភិបាល លោកត្រូវបានប៉ូលិសចាប់ខ្លួនជាច្រើនដង។ លោកMujica បានរត់គេចខ្លួនចេញពីពន្ធនាគារ ២ដង ប៉ុន្តែត្រូវចាប់ខ្លួនបានទាំងពីរដង និងជាប់ពន្ធនាគារសរុបរហូតដល់ ១៤ឆ្នាំ។ នៅឆ្នាំ១៩៨៥ អតីតប្រធានាធិបតីទី៤០ រូបនេះ រួមជាមួយអ្នកទោសនយោបាយផ្សេងទៀត ត្រូវដោះលែងឲ្យមានសេរីភាពក្រោមការលើកលែងទោសមុនកាលកំណត់។

បរិច្ចាគប្រាក់ខែ ៩០ភាគរយ ជាជំនួយសប្បុរសធម៌

មិនត្រឹមតែមានងារជា "ប្រធានាធិបតីក្រជាងគេលើលោក" ទេ លោក Mujica ក៏មានរហ័សនាមថា "ប្រធានាធិបតីដាក់ខ្លួនជាងគេលើលោក" ផងដែរ ដោយសាររបៀបរស់នៅ និងការបរិច្ចាគប្រាក់ដ៏ច្រើនក្រាស់ក្រែលរបស់លោក។ ៩០ភាគរយ នៃចំនួនប្រាក់ខែ ១២០០០ដុល្លាររបស់លោក ត្រូវបរិច្ចាគជាជំនួយមនុស្សធម៌ដល់ជនក្រីក្រនានា។ មានន័យថាក្នុងមួយខែ លោក Mujica ទទួលប្រាក់បៀវត្សរ៍ក្នុងនាមជាប្រធានាធិបតីត្រឹម ១២០០ដុល្លារប៉ុណ្ណោះ។

ឡានកញ្ចាស់មានតែមួយ បើលក់បានថ្លៃយកលុយជួយជនគ្មានជម្រក

កាលពីចុងឆ្នាំ២០១៤ លោក Jose Mujica បាននិយាយថា មានគេស្នើសុំទិញឡានម៉ាក Volkswagen Beetle ផលិតឆ្នាំ១៩៨៧ របស់លោក ក្នុងតម្លៃ ១លានដុល្លារ។ ប្រធានាធិបតីទី ៤០របស់អ៊ុយរុយហ្គាយរូបនេះបានបញ្ជាក់ថា បើលោកទទួលបានមួយលានដុល្លារពីការលក់ឡាន លោកនឹងបរិច្ចាគលុយទាំងនោះជួយសាងសង់ផ្ទះដល់អ្នកគ្មានជម្រក។ ប្រសិនបើបានឡាន ១០គ្រឿងជាថ្នូរវិញ លោកនឹងផ្ដល់វាទៅឲ្យការិយាល័យសុខភាពសាធារណៈ។ សកម្មភាពនេះ បាននាំឲ្យមនុស្សទូទាំងពិភពលោកកោតសរសើរយ៉ាងខ្លាំង បើទោះបីពេលនេះលោកមិនទាន់បានលក់ឡាននោះក្ដី។

ចប់អាណត្តិប្រធានាធិបតីក្នុងវ័យ៧៩ឆ្នាំ តែប្រជាជនមិនដាច់អាល័យ

មុនក្លាយជាប្រធានាធិបតី លោក Mujica ធ្លាប់កាន់តំណែងជាសមាជិកព្រឹទ្ធសភា និងរដ្ឋមន្ត្រីក្រសួងកសិកម្ម។ លោកបានឈ្នះឆ្នោតលើអតីតប្រធានាធិបតីចាស់ និងឡើងកាន់តំណែងជាផ្លូវការនៅថ្ងៃទី០១ ខែមិនា ឆ្នាំ២០១០។ រយៈពេល ៥ឆ្នាំ អតីតអ្នកតស៊ូនយោបាយរូបនេះ បានឆក់យកក្ដីស្រលាញ់ពីប្រជាជនទូទាំងប្រទេស។ ការកសាងស្នាដៃជាច្រើន ព្រមទាំងទឹកចិត្តគិតប្រយោជន៍ជាតិជាធំ គឺជាអ្វីដែលប្រធានាធិបតីដ៏តោកយ៉ាករូបនេះប្រកាន់យក។

ទោះបែបក្ដី ប្រទេសអ៊ុយរុយហ្គាយបានកំណត់ឲ្យប្រធានាធិបតីអាចកាន់អំណាចត្រឹមមួយអាណត្តិប៉ុណ្ណោះ ស្មើនឹង ៥ឆ្នាំ។ ថ្ងៃទី០១ ខែមិនា ឆ្នាំ២០១៥ ជាពេលវេលាដែលអតីតប្រធានាធិបតីរូបនេះចប់អាណត្តិដឹកនាំប្រទេស ប៉ុន្តែប្រជាជននៅតែគោរពស្រលាញ់លោក មិនដាច់អាល័យចំពោះការចាកចេញឡើយ។ លោកបានបញ្ចប់អាណត្តិប្រធានាធិបតីក្នុងវ័យ ៧៩ឆ្នាំ៕