ក្រុមគ្រួសារ រៀបរាប់អំពីដំណើររឿងមុនពេលដែល កែវ បញ្ញា ត្រូវឃាតករសម្លាប់

ភ្នំពេញ៖ បន្ទាប់ពីទទួលបានសេចក្តីរាយការណ៍ កម្លាំងសមត្ថកិច្ចមូលដ្ឋានបានចុះពិនិត្យ លើសាកសព ដែលមានភួយផ្កាពណ៌ក្រហមចំនួន១ ភួយពណ៌ផ្កាឈូកលាយសចំនួន១ និងកន្សែងពោះគោពណ៌ស្វាយចំនួន១ ដែលរុំសាកសពហើយចងខ្សែនីឡុងសំរាប់ចង ១ខ្សែប្រវែង ០៩ម៉ែត្រ០២តឹក និងឌុយខ្សែភ្លើងដោតអគ្គិសនី ពណ៌ខ្មៅចំនួន ០១មានប្រវែង ១ម៉ែត្រ៤២តឹក បានរឹតជាប់កសពស្ត្រីខាងលើ ត្រូវបានសមត្ថកិច្ច ដឹ​កយកមកធ្វើកោសល្យវិច្ឆ័យនៅវត្តក្រាំងធ្នង់ ។
សមត្ថកិច្ចជំនាញកោសល្យវិច័យ និងក្រុមគ្រួសារនៃសព នាពេលនេះ​ បានស្គាល់អត្តសញ្ញាសាកសពហើយ មានឈ្មោះថា កែវ បញ្ញា អាយុ២១ឆ្នាំ មុខរបរធ្វើការនៅ55Club ម្តុំចតុមុខ ស្នាក់នៅភូមិក្បាលថ្នល់ សង្កាត់ចាក់អង្រេលើ ខណ្ឌមានជ័យ ។
ប្រភពព័ត៌មានពីសាច់ញាតិ បានឲ្យដឹងថា នៅថ្ងៃកើតហេតុ ជនរងគ្រោះសម្រាកអត់ធ្វើការទេ ហើយនៅវេលាម៉ោង៦ល្ងាចថ្ងៃទី១៥ ខែវិច្ឆិកា បានជិះម៉ូតូស្កុកពី មួយគ្រឿង និងទូរស័ព្ទ មួយគ្រឿងចេញពីផ្ទះ ដោយប្រាប់ថា ទៅជួបមិត្តភក្ដិបន្តិចទៀតត្រឡប់មកវិញហើយ នាំបងប្អូនទៅដើរលេងបុណ្យអុំទូក ស្រាប់តែចេញទៅបាត់រហូត តែសាច់ញាតិមិនបានចាប់ អារម្មណ៍ទេ ដោយសារតែកន្លងមកជនរងគ្រោះធ្លាប់ទៅធ្វើការយប់ជ្រៅ ក៏មិនបានត្រឡប់មកផ្ទះម្តងម្កាលដែរ ។ ទាល់តែព្រឹកឡើង ស្តាប់ព័ត៌មាន ទើបដឹងថាមាននារីម្នាក់ត្រូវឃាតករឹតក សម្លាប់រុំភួយយកទៅប្លុងចោល សាច់ញាតិបាននាំគ្នាទៅមើល ដោយសារតែទាក់ទងទូរស័ព្ទអត់បាន ពេលទៅដល់ឃើញស្គាល់ថាជាជនរងគ្រោះពិតប្រាកដមែន ។
គួរបញ្ជាក់ថា សពស្ត្រីរងគ្រោះខាងលើត្រូវបានអ្នកករើសអេតចាយបានប្រទះឃើញចងខ្សែរុំនឹងភួយយកមកបោះចោលជាមួយគំនរសំរាម មិនដឹងស្លាប់តាំងពីពេលណាទេ កាលពីវេលាម៉ោង១០និង៤០នាទីព្រឹកថ្ងៃទី១៦ ខែវិច្ឆិកា ឆ្នាំ២០១៦ តាមបណ្តោយផ្លូវលេខ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រជាពលរដ្ឋបាននិយាយថា មុនពេលកើតហេតុ ក្រុមអ្នករើសសំរាមបានទៅកកាយគំនរសំរាម ស្រាប់តែប្រទះឃើញ ក្រណាត់មួយរុំជិត ប៉ុន្ដែឃើញជើងមនុស្ស ចេញមកក្រៅ ក៏មានការភ្ញាក់ផ្អើលតែម្ដង។ ក្រោយកើតហេតុ មន្ដ្រីនគរបាលមូលដ្ឋាន បានចុះទៅដល់កន្លែងកើតហេតុភ្លាមៗ ដើម្បីធ្វើការស្រាវជ្រាវ ប៉ុន្ដែជំហានដំបូង សមត្ថកិច្ចសន្និដ្ឋានថា សាកសពជាមនុស្សស្រី។​ បច្ចុប្បន្នមន្ដ្រីនគរបាលជំនាញ កំពុងតែធ្វើការស្រាវជ្រាវបន្ដ រកកន្លែងកើតហេតុដំបូងនៃអំពើឃាតកម្មលើកញ្ញា កែវ បញ្ញា នៅទីណា? ដើម្បីឈានដល់ការកំំណត់មុខសញ្ញាជនសង្ស័យ ព្រមទាំងវត្ថុតាងផ្សេងៗទៀត ៕